Joh 12 | WSK | STEP | Tom 6 namuruk se Passover tom tai aratukko, tom mu Jesus Bethany namaram, Lazarus kueram se nu mumam wore ko wonong te namaram.

John 12

Maria gureng siring yawara Jesus suwik te waram

(Mat 26:6-13; Mark 14:3-9)

1 Tom 6 namuruk se Passover tom tai aratukko, tom mu Jesus Bethany namaram, Lazarus kueram se nu mumam wore ko wonong te namaram. ^{▼▼John 12:1 Lazarus: John 11:1,43.} 2 Se nuna mu te Jesus ko na inang nungurman.

Se Lazarus nu kari Jesus ilak na namonko wore arungak daigam bagakaso. Se Martha mu na yu nunguru nungaruwakaso. 3 Se Maria mu gureng siring yawara, ko ikup pound suwanta ^{▼▼John 12:3 Mu kilo te 330 grams iwita.}, manga kalel biya te diaram, mu giam ago tairam ale Jesus suwik te waram ale palungam ale ko mone te kaogam. Se gureng mu ko siring yawara kawam naung ago terong mam.

4 Bare Jesus ko olekem bo, Judas Iscariot, kari maingte Jesus kager kari nuguting te bitirukko, umutang balam, 5 “Awuk se ana gureng siring yawara sowore aniram se diaman ale koma manga silver 300 taman ale kariimet nungumik mel mena mu me nungarman a?” ^{▼▼John 12:5 Gureng siring yawara sumu year suwanta ko ura tata wore ko koma iwitata.}

6 Bare Judas kari nungumik mel mena mu nunga ikia to se me balukaso, nu tere kari se uwuta balukaso. Nu manga bitarukaso ale sang ningi tere nokaso.

7 Se Jesus nu maonam, “Gomang ikup me tuiko. Nu gureng siring yawara imi tom ani mutim ningi aga betemonko mu ko angimik nungam. 8 Kariimet nungumik mel mena mu tom suen biya nina nengerak bagomonko. Bare ani mu tom suen biya me nengerak bagirikko.”

Priest bibiya Lazarus momonko den nungurman

9 Se Juda kariimet suen biya Jesus Bethany bagaram mu ikiman ale kote tai gilingiman. Bare nuna Jesus la aringimonko me taiman, Lazarus, kari kueram bare Jesus mumam se barasam, mu ago aringimonko taiman. 10 Butata se priest bibiya Lazarus ago momon se kuerukko den nungurman. 11 Mu awuk, Juda kariimet suen biya Lazarus barasam ko ikikasan ale priest bibiya nunga bitakasan ale Jesus ko nongomang ningi nunguning akaso se.

Jesus king iwita Jerusalem ningi kasu naguram

(Mat 21:1-11; Mark 11:1-11; Luke 19:28-40)

12 Ukiram se kariimet motam biya Passover tom biya aringimonko taiman baga se Jesus Jerusalem taiwoso mu ko den ikiman. 13 Ale pator gawa giman ale nu aringimonko lage te namaman aringiman ale amilmilakasan ale aikasan:

“Hosiana! Anananga king amilmil tunakko!”
“Kari Biya marak sokel tuam se ko nup te taiso!
Nu ana Israel nanga King, ko nup patowanakko!”
14 Se Jesus donkey bo te aragam daigam ale taiwakaso, Kaem ko den te giram balam iwitata:

15 “O Zion wonong, ni me nguangerko!
Arikko, nika Kari Biya taiso iweya!
Nu donkey gotek aragam taiso iweya!” ^{▼▼John 12:15 Zechariah 9:9.}
16 Tom umu te noko olekem mel mu ko duap me ikikasan. Bare udagi te tom Jesus kueram ale barasam nup biya tam mu te nuna sinar woreman. Se Kaem ko den te mel nu kumik te aratukko balam mu nungamin ares mam, se balman, “Kaem ko den mel balam borta aratam se ana aringiman.”

17 Kariimet motam biya Jesus aringimonko namakasan. Mu awuk, tom Jesus Lazarus kueram bare mumam se barasam mu te kariimet suen biya ago bagaman, ale kilek biya beteram mu aringiman. Ale namaman Jerusalem wonong ningi ko duap balu balu geragaman, se kariimet ikiman ale aringimonko namakasan. 19 Se Pharisee kari nongota nunumi manarukasan ale balukasan, “Aringiman e? Kariimet suen biya nu kowom karoman namasan! Ana mel betesan mu me terong!”

Greek kari saki Jesus aringimonko taiman

20 Passover tom biya te Greek kari saki tom mu te ago Kaem nup patawomonko Jerusalem taiman bagakasan. 21 Ale nuna Philip, Galilee sor te Bethsaida wonong ko kari, mu kote namaman ale manorman, “Nanga bo,” maman, “ana Jesus aringinakko.”

22 Se Philip namaram Andrew maonam ale wete namaman Jesus manorman. 23 Se Jesus nunga maonam, “Tom Kari ko Kuriang te nup biya taukko mu tai aratam. 24 Ani nunguningta ninga manorsam, kon muguri bo yam aniruk, mu kota suwanta bagurukko. Bare ali ningi kapuruk iwirok, mu gurek paguk tarigiruk ale nunguning suen biya kapurukko. 25 Kariimet nongota nunga ikia nongomang karo tumon, mu nuna marak nunguning me tamonkowo. Bare kariimet nongota nunga nongomang nunga ikia ali imi te mu nuburing tumon, mu nuna marak nunguning tom suen biya te bagomonko mu tamonkowo. 26 Awiriya aninga ura bitirukko kueso, mu nu aninga agowom karukko. Ale kuwim apareyate ani bagasam umu te ani agarak bagurukko. Se aninga Ait kari umutang mu nup patawurukko.”

Nuna Kari ko Kuriang patawu kualala ituwumonko

27 “Aitak angamang ninguru batagoso. Se ani awuk balik? Agi balik, ‘Ba, ikup ani angimik te aitakta aratukko negawoso mu kutuwurko,’ maik i? Mena. Mu ani ikup borta giekko tairem. 28 Se Ba, ka nip biya nikitang ago wetang te bitar se kariimet nip patawomonko!”

Jesus iwita balam asele kuring bo iwita duruk wonong te tai kaparam, “Aninga aip biya nikitang ago maingkala wetang te beterem, ale akingtala wetang te bitirikko.”

29 Se kariimet pingi sanamiwaman mu kuring mu ikiman ale balukasan, “Pure pagam,” makasan. Se saki balukasan, “Engel bo nu ilak munakaram,” makasan.

30 Bare Jesus nunga maonam, “Den imi aninga sangukko me aratam, mu nenenga sangukko aratam. 31 Aitak tom Kaem ali imi ko kariimet nunga tuterukko mu tai aratam, ale ali imi ko supuling Satan karuk se tagi taukko. ^{▼▼John 12:31 Satan: John 16:11.} 32 Udagi aga patawu kualala aga ituwumon, se tom mu te ani kariimet suen la nunga giek se aningate taimonko.” ^{▼▼John 12:32 Tam kangono te ituwumonko den: John 3:14; 8:28.} 33 Nu uwuta balam mu nu aguwaya kuerukko wore balam.

34 Se kariimet nu manorman, “Ana Kaem ko batoga te den iwita ikisan, Kristus me kuerukko, tom suen biya bagurukko. Se ni awuk se balsam Kari ko Kuriang patawu kualala tagimonko balsam? Se Kari ko Kuriang mu awiri ya?”

35 Se Jesus nunga maonam, “Tom katirta mu te nikim nina nengerak bagurukko. ^{▼▼John 12:35 Jesus mu Nikim: John 1:9; 8:12; 12:46.} Se nina nikim mu te aolak ilu sagaral, mu te nina tiromorom nengete me tai kapurukkowo. E kari tiromorom ningi aolak iluso, mu nu lage aguwaya te namurukko me arigiso. 36 Buta se nina aitak nikim ago bagasan la, nikim ko nengemang ningi nunguning aruk, se nina nikim mu ko kariimet ko aratalko.”

Jesus den mu balu kutuwuram ale nunga beteram ale yumura la bagakaso se me arikasan.

Juda suen biya Jesus ko nongomang ningi me nunguning aram

37 Kariimet mu Jesus kilek sokel ago suen biya beteram mu aringiman, bare nuna noko nongomang ningi me nunguning aram. 38 Buta se prophet Isaiah ko batoga nunguning aratam. Nu iwita balam:

“Kari Biya, ana den balman, bare bo ta me gomang ningi nunguning aram.
Kariimet nika sokel aringiman, bare me ko giris palagaman.” ^{▼▼John 12:38,40 Isaiah 53:1; 6:10.}
39 Nuna Jesus ko nongomang ningi nunguning arukko me terong mu ko duap Isaiah den bo te iwita balam:

40 “Kaem nononga nomotam kaolam se mel aringimonko me terong.
Ale nononga ikia mel ninguru te ikimonko mu kaolam,
se nononga nusupulingkiri mel ninguru ko ikimonko me terong.
Buta se giris palagomon aningate taimon se ani nunga dingumurekko me terong.”
41 Isaiah den mu balam mu nu Jesus ko nikim sokel arigam ale noko uwutata balam.

42 Bare Juda supuling saki suen biya tala Jesus ko nongomang ningi nunguning aram. Bare nuna Pharisee nunga nguangakasan, ale nononga nongomang ningi nunguning mu wetang te me balukasan, Pharisee alo synagogue ningi nunga karomon bore ko. 43 Mu awuk, nuna kariimet nunga kuemon ale nunup patawomonko ninguru ko kuakasan. Bare diram betemon se Kaem nogo ko amilmilurukko ale nunup patawurukko ikia me tokasan, ewerete se.

Jesus ko den mu kariimet nunga tuterukko

44 Jesus biyala balam, “Awiriya ani ago ko gomang ningi nunguning aso, mu nu ani ago ko la me gomang ningi nunguning aso, nu Kari aga beteram se tairem mu ko ago gomang ningi nunguning aso. 45 Se awiriya aninga agarkoso, mu nu Kari aninga beteram se tairem mu ago arigiso. 46 Ani nikim iwita ali imi te tairem, mu kari awiriya ani ago ko gomang ningi nunguning aruk mu tiromorom ningi me bagurukko, mu nikim karogo bagurukko tairem.

47 “Se awiriya aninga den ikiso ale me karo tuso, mu ani nu me tutesam. Mu ani ali imi ko kariimet nunga tuterikko me tairem. Mena. Mu ani nunga giekko tairem. 48 Kari ani buring aisiso ale aninga den me karo tuso, mu ko tutera kari bagoso: den ani balukasam umutang tom nukum te kari mu tuterukko. 49 Mu awuk, den ani balukasam mu ani agata aga ikia te me balukasam, bare aga Ait aga beteram se tairem nu den suen biya mu balikko balam se balukasam. Ani ikisam noko den mu marak nunguning tom suen biya te bagara ko mu kariimet nungarso. Buta se den suen biya balsam mu aga Ait balikko balam se balsam.”

50